Häxe Orbiter 4

Miir Häxe duens zer Kenntnis nää,
Konkurränz het`s fir is gää,
dr Piccard het mit letschter Graft,
doch no s`Abendüür gschafft,
numme mit Windgraft isch im Booge,
aimol äär um d`Ärde gflooge.

Mit sym Ko - Pilot an Boord,
isch das neie Wältrekord,
in Chateau d`Oex - im Wältschland unde,
isch`s jetz äntlig iberwunde,
es git kai Röschtigraabe mee,
miir Häxe hään`s dur d`Wulgge gsee.

Fascht noch zwanzig lange Daage,
het dr Piccard kenne saage,
miir kurve jetz dur d`Wulgge duure,
ych hoff - miir fliege nit uff d`Schnuure,
doch s`Gligg isch em zer Syte gschtande,
und äär het problemlos kenne lande.

Miir Häxe sind do besser draa,
als dä wiirgglig muetig Maa,
miir glemme d`Bääse zwische d`Bai,
hogge druff numme ganz elai,
bruuche au kai Ko - Pilot,
denn Häxe kööme nie in Not.

Miir wyyche uus au jeedem Wind,
und fliege ainewääg allewyl gschwind,
meischtens numme mit Iberschall,
lutlos und ganz ooni Knall,
schtarte au uff jeedem Boode,
alllewyl sänkrächt numme nach oobe.

Nyydlos muess me anerkenne,
gwunne het dr Piccard s`Renne,
äär kämpft jetz no fir d`Frauerächt,
miir Häxe finde das nit schlächt,
das isch unseri Reaktion,
miir hän ihn gweelt als Schutzpatron.

Miir mache jetz no au Kritik,
und maine zer Politik,
me mies scho Äärnschthaft noochedängge,
wäm me will s`Vertraue schängge,
denn eerlich sy - isch nüm so Drumpf,
doch allewyl mee dr Schlamm und Sumpf.

Im Europort wird wyter baut,
das hätte mir uns nit getraut,
dä isch doch uff Franzoseboode,
au schnurre dry - wie allewyl: d`Schwoobe,
miir Baasler hän kai anderi Waal,
dr Fluugläärm wird nur uns zur Gwaal.

E Stadtkantoon het halt kai Boode,
fir e Fluugplatz wie in Klote,
mir hoffe numme - s`tuet nie basiere,
dass mir mit Ziiri fusioniere,
miir Häxe heebe das in Eere,
suscht mues dr Blocher fliege leere.

Was weiss e orientierti Häx,
d`Olympiade - zwaiduusigundsäggs,
wird nit in Sion duure gfiert,
im Wallis sin si voll schockiert,
me sött halt uff em Boode blyybe,
und nit zem voruus d`Händ scho ryybe.

Miir Häxe gään no gar kai Rue,
und mache noonemol ain derzue,
dr klangvoll Namme Jacqueline Fendt,
isch uns nämlig au nit fremd,
vilicht het numme das Maitli miese,
ganz aifach halt fir anderi biesse.

Nit alles hängge miir an d`Glogge,
süscht schloot`s aim doch no us de Sogge,
dermit miir d`Faasnacht nit verpenne,
miese mer au an d`Goorteesch renne,
das sind fir uns die scheenschte Dääg,
numme denn sin miir so richtig zwääg.

d Häxe