Böörn-Out - Zrugg zu de Wuurzle

Me isch kabutt und uff de Wegge
und duet ab jeedem Fuurz verschregge,
me fyylt sich nur hool und läär
und s`dängge fallt aim wiirgglig schwäär,
bisch gstresst, allewyyl unter Strom,
denn hesch ganz glaar s`Böörn-Out-Syndrom.

Wurums uf änglisch gsait muess si,
daas gseehn mir Häxe gar nit i,
e soo ne Fremdwoort isch e Saich,
däm sait me z`Basel biirrewaich.

Bisch ganz unde, mainsch bisch doot,
gosch zem Huusarzt in dr Noot,
wirsch psychologisch zämme gfliggt,
au ins kinschtlige Kooma gschiggt,
isch dr Wuurm din, es isch kai Hohn,
hesch denn halt s`Knock-Out-Syndrom.

Mir Häxe blyybe uff em Boode,
hän e aigeni Heilmethode,
schluggsch zeerscht unsre Wunderthee,
das leest dr Chrampf und macht nit wee,
gnueg schloofe muess jo au no si,
das ghört zue unsre Therapie.

Emool wird d`Wältsproch uf dr Äärde,
vermuetlig texas-änglisch wärde,
z`Basel heimisch dien mir blyybe,
dr Zeedel nit uff änglisch schryybe,
mit stelle uns ganz aifach schtuur,
denn Baaseldyytsch - das isch Kultuur.

d Häxe