Sujet 2003

Sujet 2000 Sujet 2001 Sujet 2002 Sujet 2003
Sujet 2004 Sujet 2005 Sujet 2006 Sujet 2007
Sujet 2008 Sujet 2009 Sujet 2010 Sujet 2011
Sujet 2012 Sujet 2013 Sujet 2014 Sujet 2015
Sujet 2016 Sujet 2017 Sujet 2018 Sujet 2019
Sujet 2020 Sujet 2021 Sujet 2022 Sujet 2023
Sujet 2024

Uusverkauf

Wär lauft so ufgstylt umenand
dr Aktekoffer in dr Hand ?

Was isch numme los in unserem Land,
hään d`Topmänäger null Verstand,
me ka das aifach nit begryffe,
waas si durregään - die Pfiffe,
si hään sich sälber nit im Griff,
de Meischte fäält dr richtig Schliff.

Waas bruucht`s - zem schnäll Karriere mache,
nit so viel - es isch zem lache,
e noodlegstraifti Schaale kauffe,
duur d`Bahnhofstrooss in Ziiri laufe,
bisch vo Gier und Macht bsässe,
dörfsch d`Aktetäsche nit vergässe.

Gsehsch guet us - hesch no alli Hoor,
stellsch di bim Mac Kinsey vor,
bisch deert nur e kurzi Zyt,
umso schnäller bisch so wyt,
es fäält dr viel e nöimeduure,
nur eins das hesch - e grossi Schnuure.

Das länggt no nit - de bruuchsch no mee,
dr näggschti Schritt tuet dr nit weh,
s`soziale Dängge isch dr färn,
drum gosch denn in e Grosskonzärn,
als grosse Boss dr Lade fiere,
wenn`s nötig isch - au nur mit schmierre.

Vom Verwaltigsroot - nit die Beschte,
mit dunggle Flägge uf dr Weschte,
hesch zem starte s`voll Vertraue,
duesch dr Lade neu umbaue,
oekonomisch falsch duesch dängge,
rentabli Firmedail - halb verschängge.

In USA und iiberaal,
git`s Lyt wie du - vom glyyche Stall,
mit vyyl Gäld wird reformiert,
wo gar nit nötig au saniert,
wenn dr no nit glunge isch ,
e Topsanierer doch scho bisch.

Wie dr ganz Verwaltigsroot,
hoggsch jetzt dinne im gliche Boot,
muesch di gar nit wyterbilde,
bisch jo gschitzt in däre Gilde,
me bruucht`s nit - als Gwaalifikation,
so blyybsch halt nur e halbi Portion.

Zem Gligg bisch nit im Fasnachtskomytee,
drum duet`s uns Häxe au nit weh,
sunscht miesste mir uns nämlig frooge,
isch es wohr oder isch es glooge,
hän die sich scho zämme grauft,
und d`Basler Faasnacht au verkaufft?

d Häxe