Kraiselmani

Was d`Häxe dir jetzt dien verzelle,
het`s Volk vo Basel gar nit welle,
die ganzi Stadt e " 30 er " Zone,
iiberall wo Lyt dien woone.

Doch macht d`Regierig was si will,
und d`Büürger blybe aifach still,
langsam mee und mee wird`s gmacht,
emool dr Verkehr no zämmechracht.

Mit in dr Faarbahn erhöhte Schwelle
und Hindernis in d`Stroosse stelle,
söll die Stadt mee woonlich wärde,
das maine au d`Verkehrsexpärte.

Die sin doch alli biirrewaich,
was söll den aimol mee dä Saich,
s`Tiefbauamt muess derzue stoo,
d`Schlaglecher aifach offe loo.

Denn isch me zwunge langsam z`fahre,
cha sicher au no Styyrgäld spaare,
doch s`Gäld spielt z`Basel gar kai Rolle,
me cha doch schepfe us em Volle.

Drum git`s e so vyyl Radarfalle,
de Büürger duet das gar nit gfalle,
e so die ganzi Stadt verschandle
und in e Gfängnis umewandle.

Überwacht wird bald e jede Egge,
d`Polizei die will das ums veregge,
muesch halt mit em Döffhelm autofahre,
chasch vilicht denn s`Buessgäld spare.

In jedere Stross e Wald voll Schilder,
mit neumodärn entworfene Bilder,
chunsch nit drus - duesch`s nit verstoh,
muesch noonemool in d`Fahrschuel go.

Wotsch Sex emool im Griene mache,
zuständig - s`Tiefbauamt für so Sache,
die hän e gueti Lösig gfunde,
im Kraisel dört am Dorrebach unde.

E Buur bepflanzt dr Innekrais,
termingerächt mit Korn und Mais,
e so chasch no Benzingäld spare,
muesch nüm so wyt ufs Land go fahre.

D`Planig " Verkehr " - söll e so nit si,
mir froge uns mit Ironie,
was isch s`näggschte - wo si mache,
sicher öbbis - au zem lache!