"Uusdringgede" im Häxe Stübli

Hesch Gluscht zem eppis guets go ässe,
hesch dr Namme vo dr Baiz vergässe,
denn luegsch aifach schnäll im Internet,
weeli Baiz die meischte Stäärnli het.

Gnuurt die Maage - jä losst dä di gar nümm in Rue
und seit dir denn e Baiz so richtig zue,
denn sotsch di schnäll uff d`Sogge mache ohni z`flueche
denn jetzt fanggts a - das grosse Baize sueche.

E Egge do, e Gässli deert
und do - jä do bisch ganz verkehrt.
Wenn de s`ändlig findsch denn bisch e huffe gloffe,
hättsch`s uff Aahib gfunde - wärsch scho lenggschtens bsoffe.

So kas eim go scho ab däm Summer
und das, das macht uns rächt viel Kummer.
Mir vier Häxe mir leen das iberhaupt nit zue,
es steert uns und das lost uns gar kei Rue.

S`Schnyyderli und die vom Baudepartemänt,
die hänn so Schnapsidee - s het kei Änd.
Mien mir unseri Stadt nach iine richte?
Mien mir uff farbigi Stüel und Schiirm verzichte?

Au e Pflanze die derf nur no ai Schtamm ha
mit säggsedrissig griene Bletter dra.
Die derfe weder glai no riisig si
und sotte suffe Wasser uss em Ryy

Hey Baasler sag hän mir das wiirgglig welle?
Dass kasch jo grad im Fäärimaa verzelle.
Fir was will s`Schnyyderli uns denn beloone,
wenn si s Baizeinterieur duet klone.

Drum hän mir vier Häxe unseri eigeni Baiz,
die het viel Charme und iire ganz speezielle Reiz.
Dä Baudepvoorschlaag dien mir boykotiere
Und so kei Stammgascht ganz verliere.